*कोकण Express*
*पणजी-कोल्हापूर बस कणकवली स्थानकात रोखली*
*एसटी कर्मचाऱ्यांना कोल्हापूरात दुय्यम पद्धतीने वागणूक…*
*कणकवली ः प्रतिनिधी*
सिंधुदुर्ग विभाग एस.टी बस कोल्हापुरात गेल्यावर बस चालकाला दुय्यम पणाची वागणूक देण्यात आली. मोबाईल व तिकिटाचे मशीन कोल्हापूर डेपो मॅनेजर श्री. पाटील यांनी आज काढून घेतली. त्यामुळे सिंधुदुर्ग जिल्ह्यातील एसटी कर्मचाऱ्यांमध्ये कोल्हापूर एसटी डेपो मॅनेजर विरोधात संताप व्यक्त झाला. सायंकाळी कणकवली बसस्थानकात आलेली पणजी – कोल्हापूर एसटी बस एक तास रोखून धरण्यात आली आहे.
दरम्यान एसटी विभागात कोल्हापूर विरुध्द सिंधुदुर्ग कर्मचाऱ्यांमध्ये वाद चव्हाट्यावर आला आहे. सिंधुदुर्ग जिल्ह्यातील एसटी बस कोल्हापूर येथे गेल्यानंतर त्या एसटी बस वाहन चालक व वाहक यांना दुय्यम पणाची वागणूक मिळते. त्या ठिकाणी प्रवाशी भरण्यासाठी दिले जात नाहीत. तसेच त्यांची मोबाईल व तिकीट एटीएम मशीन, आत मध्ये रोख रक्कम असणारी काढून घेतली जाते .
त्यामुळे कणकवली एसटी बस रोखण्यात आली. यामुळे कणकवली स्थानकात काही काळ वातावरण तणावाचे झाले आहे. जोपर्यंत आगार व्यवस्थापक येत नाही तोपर्यंत बस सोडली जाणार नाही, असा इशारा सिंधुदुर्ग जिल्ह्यातील एसटी कर्मचाऱ्यांनी दिला आहे. येथील बस स्थानकात एसटी कर्मचारी कोअर कमिटी अध्यक्ष अंनत रावले, सचिव रोशन तेंडुलकर, गणेश शिरकर आदींसह कर्मचारी आंदोलन करत आहेत.
