*कोकण Express*
*तळेरे येथील महावितरण कंपनीची वीजपुरवठा करणारी मुख्य डीपी होती सताड उघडी.अखेर त्या वृत्ताची दखल घेऊन ती करण्यात आली बंद*
*ह्यूमन राईट असोसिएशन फॉर प्रोटेक्शन या संघटनेचे कणकवली तालुका उपाध्यक्ष राजेश जाधव यांच्या मागणीला यश आले*
*कासार्डे ः संजय भोसले*
मुंबई गोवा महामार्गानजीक तळेरे येथील डोंगरे किराणा दुकाना समोर बसविण्यात आलेली महावितरण कंपनीची वीजपुरवठा करणारी मुख्य डीपी सताड उघडी ठेवण्यात आली होती.याबाबत चुकून एखाद्याला शाॅक लागून दुर्दैवी दुर्घटना घडल्यास त्याला जबाबदार कोण? असा सवाल ह्यूमन राईट असोसिएशन फॉर प्रोटेक्शन या संघटनेचे कणकवली तालुका उपाध्यक्ष राजेश जाधव यांनी तळेरे उपविभागाचे कनिष्ठ अभियंता श्री.गावकर यांची भेट घेऊन उपस्थित केला होता.अखेर त्या वृत्ताची गंभीर दखल घेऊन तातडीने उघडी असलेली डीपी बदलून बंद करण्यात आली.
मुंबई गोवा महामार्गाचे चौपदरीकरणाचे काम करीत असते वेळी रस्त्याशेजारी असलेले वीजेचे पोल तसेच वीजवितरणच्या डीपी अन्य ठिकाणी हलविण्यात आल्या.मात्र तळेरे येथील डोंगरे दुकानासमोर बसविण्यात आलेली डीपी सताड उघडी ठेवण्यात आलेली होती.ती सर्व्हीस रोड शेजारील पदपथाला लागूनच होती.त्या डीपीला बंद करण्यासाठी दरवाजाच शिल्लक नव्हता आणि सदरची डीपी जमिनीलगत कमी उंचीवरती बसविण्यात आली असल्याने तसेच सदरचे ठिकाण हे नेहमीचे वर्दळीचे ठिकाण असून शालेय विद्यार्थी,लहान मुले तसेच ग्रामस्थ सतत येतजात असल्याने धोकादायक बनले होते.
वीज उपकरणांच्या विद्युतभारीत तारा (वायर्स) निष्काळजीपणे खुल्या ठेवण्यात आल्या होत्या.याकडे संबंधित यंत्रणेने संपूर्णपणे दुर्लक्षच केले होते.जर त्याठिकाणी एखादा अपघात घडून जीवितहानी झाली तर त्याला जबाबदार कोण? असा प्रश्न राजेश जाधव यांनी कनिष्ठ अभियंता श्री.गावकर यांना विचारुन महावितरण तळेरे विभाग कार्यक्षेत्रातील सर्व उघडे असलेले वीज डी.पी.व धोकादायक वीज तारा व पोल इत्यादींची पाहणी करून त्याबाबत तातडीने उपाययोजना करण्याची मागणी केली होती.
त्या बाबतचे वृत्त प्रसिद्ध होताच महावितरण कंपनीने तातडीने दखल घेऊन सदरची उघडी असलेली डीपी अखेर बंद करण्यात आली.ह्यामुळे ह्यूमन राईट असोसिएशन फॉर प्रोटेक्शन या संघटनेचे कणकवली तालुका उपाध्यक्ष राजेश जाधव यांनी केलेल्या मागणीला यश मिळाले आहे.
