*कोंकण एक्सप्रेस*
*आईच्या वाढदिवसानिमित्त सामाजिक उपक्रम; मनोज राणे यांच्याकडून गरजू विद्यार्थ्यांना शैक्षणिक साहित्याचे वाटप*
*भाईंदर/सिंधुदुर्ग : संजना हळदिवे*
आई म्हणजे संस्कारांचे अधिष्ठान आणि प्रेमाचा सागर. याच भावनेतून आपल्या मातोश्रींच्या वाढदिवसाचे औचित्य साधून सामाजिक बांधीलकी जपत एक आगळावेगळा उपक्रम राबविण्यात आला आहे. आज, २ जुलै २०२६ रोजी आपल्या मातोश्रींच्या वाढदिवसानिमित्त, शिवसेना सह संपर्कप्रमुख (सिंधुदुर्ग) तथा प्रतापराव राणे एज्युकेशन एन्ड चॅरिटेबल ट्रस्टचे संचालक मनोज प्रताप राणे यांनी विद्यार्थी हिताचा निर्णय घेतला आहे.
शाळेत शैक्षणिक साहित्य वाटप
आईप्रती प्रेम व्यक्त करतानाच, ज्या शाळेत स्वतः शिक्षण घेतले, त्याच शाळेतील विद्यार्थ्यांसाठी काहीतरी करावे, या उदात्त हेतूने मनोज राणे यांनी पुढाकार घेतला आहे. प्रतापराव राणे एज्युकेशन एन्ड चॅरिटेबल ट्रस्टच्या वतीने संबंधित शाळेतील गरजू विद्यार्थ्यांना शैक्षणिक साहित्याचे वाटप करण्यात येणार आहे. वाढदिवसाचा खर्च टाळून तो समाजाच्या उपयोगासाठी खर्च करण्याचा त्यांचा हा निर्णय अनेकांसाठी प्रेरणादायी ठरत आहे.
भावनिक संवाद
यावेळी आपल्या भावना व्यक्त करताना मनोज राणे म्हणाले की, “आई म्हणजे केवळ एक शब्द नसून ती एक सुरक्षित भावना आहे. माझ्या आयुष्यातील प्रत्येक चढ-उतारात खंबीरपणे पाठीशी उभ्या राहणाऱ्या माझ्या लाडक्या आईला वाढदिवसाच्या हार्दिक शुभेच्छा. त्यांना उत्तम आरोग्य आणि दीर्घायुष्य लाभो, हीच ईश्वरचरणी प्रार्थना.”
समाजसेवेच्या कार्याला प्राधान्य देऊन राबविलेल्या या उपक्रमाचे सर्वस्तरातून कौतुक होत आहे.
