*कोकण Express*
*▪️सावंतवाडीतील दुहेरी हत्याकांड प्रकरण “सीआयडी”कडे देण्याची मागणी करणार…*
*▪️आमदारकीची स्वप्ने पाहणाऱ्यांनी पहिले पालिकेत निवडून येऊन दाखवावे…*
*▪️आमदार दिपक केसरकर*
माझ्या निवडणूकीला अजून तीन वर्षे बाकी आहेत त्यामुळे आमदारकीची स्वप्ने पाहणार्‍यांनी पहिले नगरपालिका निवडणूकीत पुन्हा निवडून येवून दाखवावे असा टोला आमदार दिपक केसरकर यांनी आज येथे नगराध्यक्ष संजू परब यांचे नाव न घेता लगावला.
दरम्यान शहरात घडलेल्या दुहेरी हत्याकांडाचा तपास सुरू आहे. याबाबत मी काही बोलणार नाही. परंतू तपासाला वेळ लागत असल्याने प्रसंगी तपास सीआयडीकडे वर्ग करण्यात यावा अशी मी मागणी करणार आहे असे त्यांनी सांगितले.
श्री. केसरकर यांनी आज या ठीकाणी पत्रकार परिषद घेतली. यावेळी त्यांनी नगराध्यक्ष परब यांच्या कारभारावर टिका केली. यावेळी ते म्हणाले, आमदारकीची स्वप्ने ज्यांना पडत आहेत त्यांनी पहिले पालिकेत पुन्हा निवडून यावे. त्यावेळी पैशाच्या जोरावर आणि योगायोगाने तुम्ही सत्तेत बसला मात्र, आता सावंतवाडीची जनता कदापिही तुम्हाला माफ करणार नाही.
केसरकर पुढे म्हणाले, जिओच्या कामात सुसुत्रता आणण्याची जबाबदारी पालिका प्रशासनाची आहे. तशा प्रकारच्या सुचना मी त्यांना देणार आहे. येणार्‍या काळात निश्चितच सावंतवाडीत परिवर्तन दिसेल असा विश्वास त्यानीं व्यक्त करुन शिवसेनेच्या नगरसेवकांवर पाकीट घेतल्याचा आरोप करणारेच पाकीट घेणारे आहेत असे ते म्हणाले.
