*कोंकण एक्सप्रेस*
*लक्झरी बसला मागाहून येणाऱ्या डंपरची जोरदार धडक : तिघेजण गंभीर जखमी*
*डंपर चलकवर गुन्हा दाखल*
*सावंतवाडी : प्रतिनिधी*
मुंबई गोवा महामार्गाच्या झाराप पत्रादेवी बायपास वर मळगाव ब्रिजच्या वरील भागात उभ्या असलेल्या पणजी येथून मुंबईच्या दिशेने जाणाऱ्या स्लीपर कोच लक्झरी बसला मागाहून येणाऱ्या डंपरने जोरदार धडक दिली.या अपघातात डंपरचालक केबिनमध्ये अडकून पडला होता तर बसच्या खाली काम करीत असलेला बस चालक व क्लिनर असे दोघेजण गंभीर जखमी झाले होते. त्यांच्यावर गोवा बांबोळी रुग्णालयात उपचार सुरू आहेत.दरम्यान,या अपघातप्रकरणी डंपर चालक केशव शंकर तारी (५०, रा. कुडाळ) अविचाराने वाहन चालवून दोघांच्या दुखापतीस व दोन वाहनांच्या नुकसानीस कारणीभूत प्रकरणी गुन्हा दाखल करण्यात आला आहे.
याबाबत अधिक माहिती अशी की, गोवा पणजी येथून मुंबईच्या दिशेने जाणारी नॅशनल ट्रॅव्हल्सची स्लीपर कोच बस (जीए ०७ एफ ८९९७) ही बस मुंबईच्या दिशेने जात होती. झाराप पत्रादेवी बायपास वर मळगाव ब्रिजच्या वर आली असताना गाडीत बिघाड झाल्याने गाडीचा पर्यायी चालक व क्लीनर गाडीखाली उतरले. गाडीच्या मागील भागात जाऊन ते पाहणी करत असताना पाठीमागून कुडाळच्या दिशेने वेगात जाणाऱ्या डंपर (जीए ०४ टी ४४८८) ने उभ्या बसला जोरदार धडक दिली.या अपघातात बस खाली पाहणी करणारे चालक बाबुराव चव्हाण (५२) व क्लिनर अमीर खान (३०, दोघेही रा. गोवा) यांना गंभीर झाली. तर डंपर चालक केशव तारी (५० रा. कुडाळ) हा डंपरच्या केबिनमध्ये अडकून पडला. त्याच्या दोन्ही पायांना गंभीररित्या दुखापत झाली होती.
या अपघाताची माहिती मिळताच सावंतवाडी पोलीस निरीक्षक अमोल चव्हाण व अन्य पोलीस अधिकारी व कर्मचारी घटनास्थळी दाखल झाले. रुग्णवाहिकेच्या सहाय्याने त्यांनी जखमींना सावंतवाडी उपजिल्हा रुग्णालयात दाखल करण्यात आले. प्राथमिक उपचारानंतर यातील बस चालक बाबुराव चव्हाण व डंपर चालक आनंद तारी या दोघांना गोवा बांबुळी रुग्णालयात हलविण्यात आले होते.याबाबतची खबर बसचा मुख्य चालक सुधाकर लक्ष्मण मोरे (५०, ऐरोली नाका चिंचपाडा, नवी मुंबई) यांनी सावंतवाडी पोलिसात दिली असून पोलीस अधिक तपास करीत आहेत.
