*कोंकण एक्सप्रेस*
*वायंगणी येथे वृद्ध दाम्पत्याच्या गळ्यातील सुमारे पाच तोळ्याचा ऐवज लंपास करुन चोरटे पसार*
*मालवण : प्रतिनिधी*
वायंगणी येथे मोटारसायकल वरुन आलेल्या दोन अज्ञात इसमांनी सेवानिवृत्त मुख्याध्यापक दामोदर साळकर वय 77 आणि त्यांची पत्नी सुप्रिया साळकर वय 70 यांच्या घरात घुसून त्यांच्या अंगावरील सोन्याचा ऐवज चोरून नेण्याची घटना सोमवारी सकाळी साडेननऊच्या सुमारास वायंगणी देवूळवाडी येथे घडली.याबाबत माहिती मिळताच घटनास्थळी आचरा पोलीस दाखल झाले होते.
दामोदर साळकर यांनी दिलेल्या माहितीनुसार आपण सकाळी तुलशीवृदांवनास अगरबत्ती लावून घरात येत असताना आलेल्या अज्ञात इसमांनी सुपारी मागण्याचा बहाना करत ते घरात घुसले. त्यांनी दामोदर साळकर यांचे रुमालाने तोंड बांधण्याचा प्रयत्न केला. यामुळे हे चोरटे असल्याचा संशय आल्याने साळकर यांनी आरडाओरडा करण्याचा प्रयत्न केला.
यावेळी चोरट्यांनी साळकर यांच्या गळ्यातील तीन चैनी मागून ओढून पळ काढला.त्यामुळे त्यांच्या चेहऱ्यावर व गळ्याला जखम झाली तर दुसऱ्या चोरट्यांने सौ सुप्रिया दामोदर साळकर यांच्या गळयातील मंगळसूत्र ओढून पळ काढला.मंगळसूत्र व तीन चैनी मिळून साळकर यांचे सुमारे पाच तोळ्यांचे ऐवज चोरट्यांनी लंपास करत पोबारा केला असल्याचे साळकर यांनी सांगितले.
सदर चोरटे हे काळ्या स्प्लेंडर वरुन आल्याचे व एक जाडा आणि एक कडकोळ शरीर यष्टीचे असल्याचे त्यांना पाहिलेल्या वायंगणी येथील बापु सावंत यांनी सांगितले.चोरीची मिहिती मिळताच आचरा पोलीस स्टेशनचे प्रभारी सहाय्यक पोलीस निरीक्षक सागर खंडागळे पोलीस कर्मचारी मिनाक्षी देसाई,सुदेश तांबे,महिला पोलीस तांबे, मनोज पुजारे यांसह सरपंच रुपेश पाटकर, सदा राणे, चंदू सावंत, सचिन रेडकर यांसह अन्य ग्रामस्थांनी धाव घेतली होती.
