*कोकण Express*
*महेश कांदळगावकर यांच्या मत परिवर्तनासाठी सर्व स्तरातून प्रयत्न सुरू !*
*शिवसेना पदाधिकारी व अनेक सर्वसामान्य नागरिकांनीही साधला संवाद ; खासदार विनायक राऊत व आमदार वैभव नाईक हेही भेट घेऊन चर्चा करणार*
मालवण नगरपालिकेचे माजी लोकनियुक्त नगराध्यक्ष महेश कांदळगावकर यांच्या शिवसेना सोडण्याच्या निर्णयानंतर मालवणातील राजकीय वातावरण ढवळून निघाले आहे. कांदळगावकर यांनी निर्णय मागे घ्यावा यासाठी सर्व स्तरातून मनधरणी सुरू आहे. अनेक शिवसेना पदाधिकारी सर्वसामान्य, जेष्ठ नागरिकही त्यांच्याशी संपर्क साधत आहेत. मतपरिवर्तनासाठी त्यांच्यावर दबाव वाढत आहे.
दरम्यान, खासदार विनायक राऊत, आमदार वैभव नाईक यांनीही त्यांच्याशी फोनवर संपर्क साधत चर्चा केली. मुंबईवरून आल्यावर प्रत्यक्ष भेट घेऊन महेश कांदळगावकर यांच्याशी चर्चा करणार असल्याचे आमदार वैभव नाईक यांनी सांगितले आहे.
नगराध्यक्ष पदाच्या पाच वर्षांच्या कार्यकाळात महेश कांदळगावकर यांनी चांगले काम केले. जनहिताची अनेक विकासकामे त्यांच्या पुढाकारातून व सर्व नगरसेवकांच्या सहकार्याने झाली. कोरोना काळात काही विकासकामाना ब्रेक लागला. मात्र आगामी काळात ती कामे जनहिताची अन्य नवी कामे केली जातील. आगामी नगरपालिका निवडणूक महेश कांदळगावकर यांच्या नेतृत्वाखाली लढवावी हा निर्णय पक्षाने यापूर्वीच घेतला आहे. हुशार, अभ्यासू व स्वच्छ प्रतिमेचे व्यक्तिमत्त्व ही त्यांची ओळख त्यांनी कायम जपली. मालवण शहरात त्यांना मानणारा मोठा वर्ग आहे. अनेक जेष्ठ नागरिक, प्रतिष्ठित नागरिक यांनी संपर्क साधून महेश कांदळगावकर यांना मतपरिवर्तन करण्याबाबत सल्ला दिला आहे. मुंबईवरून आल्यावर दोन दिवसात मीही त्यांची भेट घेऊन चर्चा करणार आहे. असे आमदार वैभव नाईक यांनी सांगितले.
लोकशाहीत जनता सार्वभौम असते. अश्याच सर्वसामान्य जनतेतून मला अनेक फोन आले. ‘आमदार साहेब तुम्ही व वरिष्ठांनी यात लक्ष घाला महेश कांदळगावकर यांचे मतपरिवर्तन करा’. या मालवण शहरातील जनतेच्या प्रतिक्रिया व महेश कांदळगावकर यांच्याबद्दल असलेला आदर निश्चितच आम्हालाही अभिमानास्पद आहे. असेही आमदार वैभव नाईक यांनी सांगितले आहे.
मतपरिवर्तन होईल ; आमदार वैभव नाईक
खासदार विनायक राऊत, संपर्क प्रमुख अरुण दुधवडकर यांनीही या विषयात लक्ष घातले आहे. खासदार यांनी महेश कांदळगावकर यांच्याशी चर्चा केली आहे. पक्षस्तरावर कोणतेही विषय असल्यास त्याबाबतही शिवसेना सचिव खासदार विनायक राऊत, जिल्हा संपर्क प्रमुख अरुण दुधवडकर हे निर्णय घेतील. महेश कांदळगावकर यांचे मतपरिवर्तन निश्चित होईल. असा विश्वास आमदार वैभव नाईक यांनी व्यक्त केला आहे.
