*कोंकण एक्सप्रेस*
*कणकवली: कनकनगर परिसरातील रस्ता रुंदीकरणाच्या कामाला सुरुवात; उपनगराध्यक्ष सुशांत नाईक आणि नागरिकांच्या प्रयत्नांना यश*
*कणकवली ः संजना हळदिवे*
कणकवलीचे उपनगराध्यक्ष सुशांत नाईक आणि कनकनगर येथील नागरिकांनी परिसराच्या विकासासाठी व रस्ता रुंदीकरणासाठी केलेल्या सातत्यपूर्ण प्रयत्नांना अखेर यश आले आहे. कनकनगर परिसरातील बहुप्रतिक्षित रस्ता रुंदीकरणाच्या कामाला प्रत्यक्ष सुरुवात झाली असून, यामुळे परिसरातील वाहतूक व्यवस्थेत मोठा सुधार होणार आहे.
कनकनगर भागातील रस्ता अरुंद असल्यामुळे अवजड आणि मोठ्या वाहनांची ये-जा करताना मोठी कसरत करावी लागत होती. आता रस्ता रुंद झाल्यामुळे वाहतूक कोंडीची समस्या सुटणार असून मोठ्या वाहनांची ये-जा अधिक सुलभ आणि सुरक्षित होणार आहे.
सुशांत नाईक यांचे स्वखर्चातून सहकार्य
या महत्त्वाकांक्षी कामासाठी उपनगराध्यक्ष सुशांत नाईक यांनी स्वतःच्या खर्चातून सहकार्याचा हात पुढे केला. तसेच, कनकनगरवासीयांनीही या कामात मोलाचे सहकार्य दाखवले. लोकप्रतिनिधी आणि स्थानिक नागरिक यांच्यातील या उत्तम समन्वयामुळेच रस्ता रुंदीकरणाचे काम यशस्वीपणे मार्गी लागू शकले आहे.
प्रत्यक्ष जागेवर जाऊन कामाची पाहणी
दरम्यान, काम सुरू झाल्यानंतर उपनगराध्यक्ष सुशांत नाईक यांनी स्वतः घटनास्थळी भेट देऊन कामाचा आढावा घेतला. रस्ता रुंदीकरणाचे काम दर्जेदार, योग्य पद्धतीने आणि लवकरात लवकर पूर्ण व्हावे, या दृष्टीने त्यांनी संबंधित कंत्राटदार व अधिकाऱ्यांशी सविस्तर चर्चा केली.
यावेळी स्थानिक नागरिक व कार्यकर्ते बाबू जाधव, प्रवीण सावंत, हर्षद शिकरे, संतोष सावंत, मोर्ये काका यांच्यासह कनकनगर परिसरातील नागरिक मोठ्या संख्येने उपस्थित होते. लोकप्रतिनिधी आणि नागरिकांच्या या संयुक्त उपक्रमाचे संपूर्ण कणकवली शहरातून कौतुक होत आहे
