*कोंकण एक्सप्रेस*
*रोटरी क्लब ऑफ कणकवली सेंट्रलचा पदग्रहण सोहळा १२ जुलै रोजी*
*रोटरी क्लबच्या नवीन कार्यकारिणीचा पदग्रहण सोहळा उत्साहात संपन्न होणार*
*रोटरी क्लब कणकवली सेंट्रलची नवी कार्यकारिणी जाहीर; सुप्रिया नलावडे अध्यक्षपदी*
*कणकवली : संजना हळदिवे*
रोटरी क्लब ऑफ कणकवली सेंट्रलच्या २०२६-२७ या कार्यकाळासाठी नूतन कार्यकारिणीची निवड करण्यात आली असून, त्यांचा पदग्रहण सोहळा रविवार, १२ जुलै रोजी सायंकाळी ६.०० वाजता अलंकार मंगल कार्यालय, कणकवली येथे उत्साहात संपन्न होणार आहे. या सोहळ्याला वाईच्या पास्ट डिस्ट्रिक्ट गव्हर्नर तथा ज्येष्ठ नेत्या रो. स्वाती हेरकल या इन्स्टॉलेशन ऑफिसर म्हणून उपस्थित राहणार आहेत.
नवीन कार्यकारिणीची धुरा
या वर्षासाठी रोटरी क्लबच्या अध्यक्षपदी रो. सुप्रिया नलावडे, सचिवपदी रो. डॉ. अमेय मराठे, उपाध्यक्षपदी रो. तृप्ती कांबळे तर खजिनदारपदी रो. डॉ. प्राजक्ता तेली यांची निवड करण्यात आली आहे.
वर्षभर राबविण्यात येणार लोकहितकारी उपक्रम
नूतन कार्यकारिणीने समाजहिताला केंद्रस्थानी ठेवून वर्षभरासाठी विविध उपक्रमांची आखणी केली आहे. यामध्ये प्रामुख्याने:
शिक्षण व आरोग्य: ग्रामीण विद्यार्थ्यांसाठी शिष्यवृत्ती परीक्षेचे मोफत मार्गदर्शन आणि अंगणवाडीतील कुपोषित बालकांसाठी विशेष पोषण अभियान राबविण्यात येणार आहे.
महिला सक्षमीकरण व युवा जनजागृती: महिलांसाठी ‘फायरलेस कुकिंग’ आणि पौष्टिक आहाराचे प्रशिक्षण दिले जाणार आहे, तर युवकांसाठी व्यसनमुक्ती अभियान राबविण्यात येईल.
समावेशकता: दिव्यांग बांधवांसाठी सहाय्यभूत साहित्याचे वाटप आणि किशोरवयीन मुलींसाठी ‘कळी उमलताना’ उपक्रमाद्वारे आरोग्य व मासिक पाळी व्यवस्थापनाबाबत जनजागृती करण्यात येणार आहे.
पर्यावरण व सामाजिक बांधिलकी: वृक्षारोपण मोहीम, जलसंवर्धन, नियमित रक्तदान शिबिरे, आरोग्य तपासणी, डिजिटल साक्षरता आणि ज्येष्ठ नागरिक सन्मानासारखे विविध उपक्रम वर्षभर आयोजित केले जाणार आहेत.
“स्वतःपेक्षा सेवेला प्राधान्य” या रोटरीच्या ब्रीदवाक्यानुसार, शिक्षण, आरोग्य आणि पर्यावरण संवर्धनाच्या माध्यमातून समाजातील प्रत्येक घटकापर्यंत पोहोचण्याचा मानस नूतन कार्यकारिणीने व्यक्त केला आहे.
