*कोंकण एक्सप्रेस*
*कणकवली: कासार्डे जि. प. मतदारसंघातून संतोष पारकर यांना भाजपाची उमेदवारी; हर्षदा वाळके व अण्णा खाडये रिंगणात*
*नांदगाव ः प्रतिनिधी*
आगामी स्थानिक स्वराज्य संस्थांच्या निवडणुकीच्या पार्श्वभूमीवर कणकवली तालुक्यातील राजकीय वातावरण तापू लागले आहे. अत्यंत प्रतिष्ठेच्या मानल्या जाणाऱ्या कासार्डे जिल्हा परिषद मतदारसंघातून अखेर भाजपा महायुतीने उद्योजक संतोष पारकर यांच्या नावावर शिक्कामोर्तब केले असून त्यांना पक्षाचा ‘ए.बी. फॉर्म’ सुपूर्द करण्यात आला आहे.
पंचायत समितीसाठी जुन्या-नव्याचा संगम असून जिल्हा परिषदेसोबतच पंचायत समितीच्या उमेदवारांचीही घोषणा करण्यात आली आहे:
नांदगाव पंचायत समिती: मागील निवडणुकीत लढत दिलेल्या हर्षदा वाळके यांना पक्षाने पुन्हा संधी दिली आहे.
कासार्डे पंचायत समिती: या मतदारसंघातून सहदेव उर्फ अण्णा खाडये यांना रिंगणात उतरवण्यात आले आहे.
विशेष म्हणजे, जिल्हा परिषद आणि कासार्डे पंचायत समितीसाठी पक्षाने नवीन चेहऱ्यांना संधी दिली आहे, तर नांदगावमध्ये जुन्या अनुभवी कार्यकर्त्यावर विश्वास दाखवला आहे.
’आपला हक्काचा माणूस’ सोशल मीडियावर चर्चेत
संतोष पारकर यांच्या उमेदवारीची घोषणा होताच कार्यकर्त्यांमध्ये उत्साहाचे वातावरण आहे. कार्यकर्त्यांनी सोशल मीडियावर “आपला हक्काचा माणूस” अशा आशयाचे पोस्टर्स आणि स्टेटस ठेवून या निर्णयाचे स्वागत केले आहे.
आरक्षणाचे गणित आणि राजकीय महत्त्व
कासार्डे जिल्हा परिषद मतदारसंघ ओबीसी सर्वसाधारण प्रवर्गासाठी आरक्षित असल्याने अनेक जण या जागेसाठी इच्छुक होते. मात्र, पक्षाने संतोष पारकर यांच्या रूपाने एका सक्षम चेहऱ्याला संधी दिली आहे.
नांदगाव पंचायत समितीमध्ये ओबीसी आरक्षण असून सभापती पदही ओबीसी महिलेसाठी राखीव आहे. त्यामुळे नांदगाव आणि नाटळ या दोन्ही पंचायत समितीच्या जागा जिंकणे महायुतीसाठी महत्त्वाचे ठरणार आहे.
निवडणुकीची व्याप्ती आणि जुने संदर्भ कासार्डे पं. स.कासार्डे, ओझरम, दारुम ,नांदगाव पं. स. गण: नांदगाव, तोंडवली, बावशी, असलदे, कोळोशी, आयनल.
मागील निवडणुकीत या मतदारसंघातून काँग्रेसचे संजय देसाई आणि भाजपा-सेना युतीचे संजय पाताडे यांच्यात अटीतटीची लढत झाली होती, ज्यात संजय देसाई विजयी झाले होते. आता बदललेल्या राजकीय समीकरणात संतोष पारकर ही जागा खेचून आणणार का, याकडे सर्वांचे लक्ष लागले आहे.
