*कोंकण एक्सप्रेस*
*रत्नागिरी गणेशोत्सव मंडळातर्फे आरोग्य मंदिर येथे माघी गणेशोत्सवानिमित्त होणार “महागणपती’’ ची प्रतिष्ठापना*
*सात दिवस विविध कार्यक्रमांचे आयोजन*
*रत्नागिरी : प्रतिनिधी*
रत्नागिरी सिंधुदुर्गचे खासदार नारायणराव राणे यांच्या प्रेरणेतून आणि कुडाळ मालवणचे आमदार निलेश राणे यांच्या मार्गदर्शनाखाली रत्नागिरीमध्ये रत्नागिरी गणेशोत्सव मंडळातर्फे आरोग्य मंदिर येथे माघी गणेशोत्सव साजरा करण्यात येणार आहे.शनिवार दि. 1 फेब्रुवारी ते शुक्रवार दि. 7 फेब्रुवारी या कालावधीत हा उत्सव साजरा होणार असून विविध कार्यक्रमांचं आयोजन करण्यात आले आहे. यामध्ये शनिवार दि. १ रोजी सकाळी ७ वाजता श्रींची प्राणप्रतिष्ठापना करण्यात येईल.तर सायंकाळी ८ ते १० या कालावधीत फुणगुस येथील बुवा गौरव पांचाळ आणि साई प्रासादिक भजन मंडळाचे भजन कार्यक्रम आयोजित करण्यात आला आहे.
रविवार दि. 2 फेब्रुवारी रोजी सकाळी 11 वाजता श्री सत्यनारायणाची महापूजा होणार असून सायंकाळी ४ ते रात्री ९ वाजेपर्यंत तीर्थप्रसाद आणि महिलांचे हळदीकुंकवाचे आयोजन करण्यात आले आहे.सोमवार दि. 3 फेब्रुवारी रोजी सायंकाळी 5:30 ते 7:30 या कालावधीत नृत्यार्पण नृत्य अकादमीच्या संचालिका गुरु सौ. प्रणाली तोडणकर- धुळप यांच्या शिष्यांचे भरतनाट्यम आयोजित करण्यात आले आहे तर रात्री ८ ते ९ या वेळेत श्री स्वामी समर्थ प्रासादिक भजन मंडळ केळये यांचे भजन होणार असून बुवा उदय मेस्त्री असणार आहेत.मंगळवार दि. 4 फेब्रुवारी रोजी सकाळी ८ वाजता शालेय विद्यार्थ्यांचे अथर्वशीर्ष पठण होईल तर रात्री ८ ते १० या कालावधीत भक्तीगीत व भावगीतांचा कार्यक्रम स्वर आराधना आयोजित करण्यात आला आहे.
बुधवार दि. ५ फेब्रुवारी रोजी सायंकाळी ४ ते ६ या वेळेत लांजा येथील श्री. कुर्णेकर महाराज यांचा हरिपाठ होणार असून रात्री ८ ते १० या वेळेत श्री साई सेवा महिला भजन मंडळ वांयगणकरवाडी आंबेशेत यांचे भजन होणार आहे.गुरुवार दि. 6 फेब्रुवारी रोजी दुपारी १२ ते ३ या वेळेत महाप्रसाद तर सायंकाळी ७ वाजता शिवप्रतिष्ठान हिंदुस्थान यांच्या उपस्थितीत महाआरती होणार आहे. शुक्रवार दि. ७ फेब्रुवारी रोजी सायंकाळी ४ ते १० यावेळेत श्रींची मारुती आरोग्य मंदिर येथून भव्य विसर्जन मिरवणूक निघणार आहे.या सर्व कार्यक्रमांना उपस्थित राहून श्रींचे दर्शनासाठी अवश्य यावे असे आवाहन रत्नागिरी गणेशोत्सव मंडळ रत्नागिरी यांच्यातर्फे करण्यात आले आहे.
