*कोंकण एक्सप्रेस*
*ॲड. ऐश्वर्य मांजरेकर यांना ‘कोकण रत्न पदवी पुरस्कार’ जाहीर*
*युवा सक्षमीकरण, सामाजिक , शैक्षणिक आणि पर्यावरण संवर्धन क्षेत्रातील कार्याची दखल*
*मालवण ः प्रतिनिधी*
स्वतंत्र कोकण राज्य अभियानातर्फे कोकणरत्न पदवी पुरस्कार कोकणातील विविध क्षेत्रात निस्वार्थीपणे उल्लेखनीय सामाजिक कार्य करणाऱ्या व्यक्तींना देण्यात येतो .यंदाचा कोकणरत्न पदवी पुरस्कार मालवण तालुक्यातील ॲड ऐश्वर्य जनार्दन मांजरेकर यांना जाहीर करण्यात आला . सामाजिक कार्य, युवा सक्षमीकरण, शैक्षणिक क्षेत्रातील योगदान आणि पर्यावरण संवर्धन या चारही क्षेत्रात सातत्याने आणि प्रभावी कार्य केल्याबद्दल त्यांना यंदाचा प्रतिष्ठेचा ‘कोकण रत्न पदवी पुरस्कार’ जाहीर झाला आहे. सदर पुरस्काराची घोषणा स्वतंत्र कोकणराज्य अभियानाचे संस्थापक अध्यक्ष श्री .संजय कोकरे सर यांच्या अध्यक्षतेखाली झाली. हा पुरस्कार कोकणातील विविध क्षेत्रात उत्कृष्ट योगदान देणाऱ्या व्यक्तींना दिला जातो. यावर्षीच्या निवडीमध्ये गुणवत्तेला, सातत्याला आणि समाजकारणातील प्रभावी योगदानाला विशेष महत्त्व देण्यात आले होते. सदर पुरस्कारासाठी १४०० पेक्षा जास्त नामांकन मुंबई शहर, मुंबई उपनगर, ठाणे, पालघर, रायगड, रत्नागिरी आणि सिंधुदुर्ग या सात जिल्ह्यांतून आले होते, त्या पैकी निवडक व्यक्तींच्या सामाजिक कार्याची दखल पुरस्कारासाठी घेतली गेली. सदर कोकणरत्न पदवी प्रदान सोहळा शनिवार, दिनांक १३ डिसेंबर २०२५ रोजी सायंकाळी ४ ते ६ या वेळेत स्थळ – मुंबई मराठी पत्रकार भवन, आझाद मैदाना जवळ, मुंबई येथे स्वतंत्र कोकणराज्य अभियानाचे संस्थापक अध्यक्ष श्री. संजय कोकरे सर यांच्या अध्यक्षतेखाली संपन्न होईल. सदर कार्यक्रमाला प्रमुख पाहुणे म्हणून वरिष्ठ पत्रकार आणि संपादक श्री.सचिन कळझुनकर सर तसेच कोकणातील नामांकित व्यक्तीची उपस्थितीत लाभणार आहे. या आधी ऐश्वर्य मांजरेकर यांना महाराष्ट्र शासनाचा जिल्हा युवा पुरस्कार २०२५ , शिवछत्रपती महाराष्ट्र गौरव पुरस्कार २०२४ , महाराष्ट्र कोकण भूषण पुरस्कार २०२३ , महाराष्ट्र सह्याद्री युवा लोकगौरव पुरस्कार २०२२, महाराष्ट्र युथ आयडॉल युवा रत्न पुरस्कार २०२१ , या पुरस्कारांनी गौरविण्यात आले आहे. सदर कोकणरत्न पदवी पुरस्कार ॲड. ऐश्वर्य वसुंधरा जनार्दन मांजरेकर यांना जाहीर झाल्याबद्दल समस्त कोकणवासियानी त्यांचे विशेष अभिनंदन केले.
