*कोंकण एक्सप्रेस*
*कणकवली येथे संस्कृतभारतीतर्फे संस्कृतदिन उत्साहात*
*कणकवली ः प्रतिनिधी*
संस्कृतभारती ,सिंधुदुर्गच्यावतीने कणकवली येथील उत्कर्षा सभागृहात संस्कृतदिनाचे आयोजन करण्यात आले होते. या कार्यक्रमाला विद्यार्थ्यांचा उत्स्फूर्त प्रतिसाद लाभला.
या कार्यक्रमात कणकवली एस्. एम्. हायस्कूलच्या संस्कृत अध्यापिका एस्. सी. गरगटे यांनी मार्गदर्शन केले.
नाटळ हायस्कूलचे निवृत्त संस्कृत अध्यापक अरूण वळंजू हे प्रमुख पाहुणे म्हणून या कार्यक्रमास उपस्थित होते. नरडवे हायस्कूलचे निवृत्त मुख्याध्यापक तसेच संस्कृतभारतीचे रत्नागिरी विभाग संयोजक मनोहर काजरेकर यांनी या कार्यक्रमाचे अध्यक्षस्थान भूषविले. संस्कृत भाषेचा प्रचार आणि प्रसार हा संस्कृतभारती या संस्थेचा प्रमुख उद्देश आहे.
माध्यमिक विद्यामंदिर कनेडी व बालकेंद्र कणकवलीच्या संस्कृत प्रेमी विद्यार्थ्यांनी या कार्यक्रमात संस्कृत गीते, स्तोत्रे, कथाकथन, संस्कृतसंभाषणे, संस्कृत गीतांवर कथ्थक नृत्ये, संस्कृत भाषेमधून मनोगत आदीचे सुंदर सादरीकरण करून उपस्थितांची मने जिंकली. या कार्यक्रमावेळी बालकेंद्र कणकवलीच्या अध्यापिका मैथिली पिळणकर व सर्व मान्यवर यांनी संस्कृतभारतीतर्फे घेण्यात आलेल्या संस्कृत परीक्षेमध्ये यशस्वी विद्यार्थ्यांना पारितोषिक वितरण केले.
संस्कृत भाषा ही प्रत्येक भारतीयाची शान असून तिचा आपण योग्य तो मान राखला पाहिजे असे प्रतिपादन प्रमुख मार्गदर्शिका एस्. सी. गरगटे यांनी यावेळी केले. मनोहर काजरेकर यांनी विद्यार्थ्यांना संस्कृत संभाषण करण्याचे आवाहन केले.
स्वरा मेस्त्री व नव्या वारंग या माध्यमिक विद्यामंदिर कनेडीच्या विद्यार्थिनींनी सूत्रसंचालन केले. कनेडी हायस्कूलचे संस्कृताध्यापक व संस्कृतभारती सिंधुदुर्गचे प्रसारप्रमुख मकरंद आपटे यांनी कार्यक्रमाचे उत्तम संयोजन केले. अरुण वळंजू यांनी उपस्थितांचे आभार मानले. या कार्यक्रमाला डॉ. विनायक करंदीकर, प्रसादिनी करंदीकर, वैजयंती करंदीकर यांची प्रमुख उपस्थिती होती.
