*कोंकण एक्सप्रेस*
*बाया’ या मराठी कवितेचा ५६ भाषांमध्ये अनुवादाचा जागतिक विक्रम करणाऱ्या गीतकार विजय जोशी यांची वर्ल्ड रेकॉर्ड्स बुक ऑफ इंडिया मध्ये नोंद*
*मालवण : प्रतिनिधि*
मालवण तालुक्यातील मसुरे गावचे सुपुत्र कवी, गझलकार, गीतकार, समीक्षक विजय जोशी (विजो) डोंबिवली यांच्या ‘बाया’ या मराठी कवितेचा ५६ भाषांमध्ये अनुवादाचा जागतिक विक्रम झाल्याने त्याची नोंद वर्ल्ड रेकॉर्ड्स बुक ऑफ इंडिया मध्ये झाली आहे
रविवार दि.१५ जून २०२५ रोजी डोंबिवली येथे वर्ल्ड रेकॉर्ड्स बुक ऑफ इंडिया चे प्रतिनिधी चीफ एडिटर सुषमा नार्वेकर आणि मार्केटिंग हेड संजय नार्वेकर यांच्या हस्ते प्रमाणपत्र आणि सन्मानचिन्ह देऊन कवी विजय जोशी (विजो) यांचा सत्कार करण्यात आला. यावेळी उपस्थित अनुवादकांनाही सन्मानित करण्यात आले.
या ५६ अनुवादित भाषांमध्ये ३४ बोलीभाषा, १५ प्रादेशिक भाषा, ७ जागतीक भाषा आहेत. (यामध्ये मोडी आणि ब्राम्ही लिपी यांचाही समावेश आहे हेही विशेष). अजूनही इतर भाषांमध्ये अनुवाद येत आहेत.
मराठी भाषा अभिजात म्हणून घोषित झाली असतानाच एखाद्या मराठी कवितेला एवढ्या मोठ्या संख्येने अनुवादाच्या सहाय्याने जागतिक पटलावर पोहोचविण्याचे महत्वाचे काम झाल्याबद्दल वर्ल्ड रेकॉर्ड्स बुक ऑफ इंडियाच्या प्रतिनिधींनी श्री विजय जोशी यांचे कौतुक केले आहे .
