*कोंकण एक्सप्रेस*
*आश्वासनानंतर एसटी कर्मचारी संघाचे उपोषण मागे*
*वेंगुर्ला प्रतिनिधी- प्रथमेश गुरव*
वेंगुर्ला आगार वाहतूक निरीक्षक, सहाय्यक वाहतूक निरीक्षक यांच्यावर कारवाईसाठी सेवा शक्ती संघर्ष एसटी कर्मचारी संघ वेंगुर्लातर्फे १ मेपासून सुरू करण्यात आलेले आमरण उपोषण शनिवारी तिस-या दिवशी पालकमंत्री नितेश राणे यांच्या सूचनेनुसार मागे घेण्यात आले. दरम्यान, पालकमंत्र्यांच्या सूचनेनुसार जिल्हा बँक अध्यक्ष मनिष दळवी यांनी कळविल्याने भाजपचे तालुका अध्यक्ष पप्पू परब यांनी भेट घेऊन आपल्या मागण्या पूर्ण केल्या जातील असे आश्वासन दिले.
वेंगुर्ला आगार वाहतूक निरीक्षक व सहाय्यक वाहतूक निरीक्षक यांच्या मनमानी आणि हुकूमशाही विरोधात सेवाशक्ती संघर्ष एसटी कर्मचारी संघाकडून २६ जानेवारी रोजी उपोषण करण्यात आले होते. त्यावेळी वेंगुर्ला तहसीलदार, आगारप्रमुख, वरिष्ठ अधिकारी यांनी तत्काळ अहवाल पाठवून कारवाईचे करण्याचे आश्वासन कर्मचा-यांना दिले होते. पण गेल्या तीन महिन्यात कारवाई अथवा लेखी स्वरूपात पत्र न दिल्यामुळे एसटी कर्मचारी संघाकडून १ मे पासून आमरण उपोषण सुरू करण्यात आले होते. या उपोषणाच्या तिस-या दिवशी एका उपोषणकर्त्याची प्रकृती बिघडल्याने त्याला उपजिल्हा रुग्णालयात उपचारासाठी दाखल करण्यात आले होते. दरम्यान, शनिवारी दुपारी जिल्हा बँक अध्यक्ष मनीष दळवी, भाजपा तालुकाध्यक्ष पप्पू परब, माजी तालुकाध्यक्ष सुहास गवंडळकर तसेच सिंधुदुर्ग विभाग नियंत्रक प्रज्ञेश बोरसे यांनी सेवाशक्ती संघर्ष एसटी कर्मचारी संघाच्या मागण्यांची योग्य दखल घेण्याचे आश्वासन दिले. त्यामुळे उपोषणकर्त्यांनी आपले उपोषण मागे घेतले आहे.
