कोंकण एक्सप्रेस
उद्या होणार दोडामार्ग वन विभागाच्या कार्यालया समोर उपोषण…
दोडामार्ग /शुभम गवस
तिलारी खोऱ्यातील गावांत ऐन काजू हंगामात हत्तींचा वावर वाढला आहे. त्यामुळे शेतकरी भयभीत झाले आहे. येत्या आठ दिवसात या हत्तींचा बंदोबस्त करावा, अन्यथा ७ मार्चपासून येथील वनविभाग कार्यालयासमोर बेमुदत उपोषण छेडण्याचा इशारा स्वराज्य सरपंच सेवा संघ जिल्हाध्यक्ष प्रवीण गवस यासह तालुक्यातील सर्व सरपंच, उपसरपंच, ग्रा.पं. सदस्य व शेतकऱ्यांनी दिला होता, याच पार्श्वभूमीवर वनविभागाच्या वरिष्ठ अधिकाऱ्यांनी आज सरपंच सेवा संघाचे जिल्हाध्यक्ष प्रवीण गवस यांची भेट घेत आम्ही अहवाल पाठवतो असे सांगत उपोषण स्थगित करावे अशी चर्चा करत विनंती करण्यात आली, मात्र ही चर्चा निष्फळ ठरली, आपण उद्या दिनांक ०७ मार्च रोजी होणाऱ्या उपोषणावर ठाम असून या उपोषणात तालुक्यातील सरपंच, उपसरपंच, सदस्य आणि अनेक शेतकरी सहभागी होणार असल्याचे त्यांनी सांगितले आहे. यावेळी हेवाळे सरपंच सौ. साक्षी देसाई यांसह मोर्ले ग्रामस्थ उपस्थित होते.
