कोंकण एक्सप्रेस
कुंभार्ली घाटात भीषण अपघातः आई-मुलाचा मृत्यू…
चिपळूण / प्रतिनिधी
कराड मार्गावर भीषण अपघात झाला आहे. रविवारी झालेला अपघाताची माहिती सोमवारी मिळाली आहे. दोन दिवसांपूर्वी झालेल्या अपघातात माय लेकाचा दुर्देवीरित्या मृत्यू झाला आहे. दोन दिवस झाले तरी आपल्या पतीचा मोबाईल लागत नाही म्हणून पत्नी पोलिसांत बेपत्ता झाल्याची तक्रार दाखल करण्यासाठी गेली. त्यावेळी मोबाईल लोकेशन वरून शोध घेतल्यावर स्विफ्ट डिझायर ही कार कुंभार्ली घाटात असल्याचं समजलं. लोकेशन मिळाल्यानंतर खोल दरीत कोसळून दोन दिवसांपूर्वीच कारला अपघात झाल्याची माहिती समोर आली आणि एकच खळबळ उडाली. विश्वजित जगदीश खेडेकर, वय वर्ष 42 आणि त्यांच्या आई सुरेखा जगदीश खेडेकर, वय वर्ष 65, या दोघाचा माय लेकाचा या अपघातात दुर्दैवीरित्या मृत्यू झाला आहे.
विश्वजीत खेडेकर हे आपल्या आईला घेऊन कुंभार्ली गावी निघाले होते. आईला सोडून ते परतणार होते. पुणे येथून रविवारी ते निघाले होते निघाले होते, मात्र दोन दिवस झाल्यानतरही पती फोन उचलत नाही. त्यामुळे विश्वजीत खेडेकर यांच्या पत्नी पोलीस स्थानकात दाखल झाल्या. पती बेपत्ता असल्याची तक्रार त्यांनी पोलिसांत दिली. त्यावेळी पोलिसांनी विश्वजीत खेडेकर यांचं लोकेशन शोधले आणि धक्कादायक घटना समोर आली. या धक्कादायक, दुर्दैवी घटनेने कुंभार्ली गावावरही शोककळा पसरली आहे.
या घटनेची माहिती मिळताच कुंभार्ली पोलिसांनी, तसंच येथील ग्रामस्थांनी कुंभार्ली घाटातील घटनास्थळी धाव घेतली. घाटात स्विफ्ट डिझायर कार तब्बल 400 फूट दरीत कोसळली होती. इतका भीषण अपघात झाला तरी मात्र हा कार दरीत कोसळल्याचं, किंवा त्या ठिकाणी अपघात झाल्याचं कोणाच्याही लक्षात आलं नाही. या सगळ्या अपघात प्रकरणाची नोंद करण्याचं काम कुंभार्ली पोलीस ठाण्यात सुरु आहे. घटनास्थळाचा पंचनामा करण्यात आला आहे.
विश्वजित जगदीश खेडेकर हे नोकरीनिमित्त पुणे येथे वास्तव्यास होते. एकाच वेळी माय लेकाचा मृत्यू झाल्याने खेडेकर कुटुंबीयावर दुःखाचा मोठा डोंगर कोसळला आहे. सहा महिन्यांपूर्वीच विश्वजीत यांच्या वडिलांचंही निधन झालं होतं, विश्वजित त्यांच्या पश्चात पत्नी आणि दोन वर्षाची मुलगी असं कुटुंब आहे. या घटनेने कुंभार्ली गाववरही मोठी शोककळा पसरली आहे
