सावंतवाडी रोड रेल्वे स्थानकाच्या ३ नंबर प्लॅटफॉर्मलगत रस्त्याचे काम सुरू

*कोंकण एक्सप्रेस*

*सावंतवाडी रोड रेल्वे स्थानकाच्या ३ नंबर प्लॅटफॉर्मलगत रस्त्याचे काम सुरू*

*जिल्हा नियोजनमधून ३ कोटी १७ लाखांचा निधी मंजूर*

*सावंतवाडी : प्रतिनिधी*

सावंतवाडी रोड रेल्वे स्थानकातील तुतारी एक्सप्रेसच्या प्रवाशांची होणारी गैरसोय आता दूर होणार असून तीन नंबर प्लॅटफॉर्मलगत पक्का डांबरी रस्ता बनविण्याचे काम सार्वजनिक बांधकाम विभागाच्या माध्यमातून हाती घेण्यात आले आहे. जिल्हा नियोजनमधून यासाठी निधी उपलब्ध करण्यात आला आहे. त्यामुळे रेल्वे स्थानकातून ओव्हर ब्रिज ओलांडून तीन नंबर प्लॅटफॉर्मवर येण्याची गैरसोय दूर होणार असून प्रवाशांनी त्याबाबत समाधान व्यक्त केले आहे.

सावंतवाडी रोड रेल्वे स्थानकात विशेषतः सावंतवाडी ते दादर जाणारी तुतारी एक्सप्रेस ही तीन नंबर प्लॅटफॉर्मवर थांबवली जाते. त्यामुळे या गाडीतून ये-जा करणारे प्रवासी व त्यांचे नातेवाईक यांची होणारी गैरसोय होत होती. रेल्वे स्थानकाच्या एक नंबर प्लॅटफॉर्मवरून तीन नंबर वर जाण्यासाठी प्रवाशांना तसेच त्यांच्या नातेवाईकांना सामानासह ओव्हर ब्रिजवर चढण्याची व उतरण्याची कसरत करावी लागत होती. विशेषतः अंध अपंग तसेच वृद्ध व महिला प्रवाशांना याचा मोठा त्रास सहन करावा लागत होता.


या पार्श्वभूमीवर काही प्रवासी खाजगी वाहने तसेच रिक्षाच्या माध्यमातून तीन नंबर प्लॅटफॉर्म च्या पलीकडे असलेल्या कच्च्या रस्त्यावरून जीवघेणा प्रवास करीत त्या ठिकाणी पोहोचत असत. त्यामुळे हा रस्ता पक्का व्हावा अशी मागणी स्थानिकांमधून केली जात होती. मात्र ही जागा रेल्वेच्या ताब्यात असल्याने व कोकण रेल्वे बोर्डाकडून त्यावर खर्च घातला जात नसल्याने अखेर सार्वजनिक बांधकाम विभागाने याबाबत पुढाकार घेऊन सदरचा रस्ता पक्का करण्याचे काम हाती घेतले आहे. त्यासाठी जिल्हा नियोजनच्या माध्यमातून तब्बल ३ कोटी १७ लाख ७२ हजार एवढा निधी मंजूर करण्यात आला आहे. पहिल्या टप्प्यात रस्त्याचा आकार, मातीचा भरावा, तसेच जीएसबी मटेरीयलचा थर, त्यानंतर खडीकरण व डांबरीकरण अशा स्वरूपात ही पक्की सडक निर्माण केली जात असून सार्वजनिक बांधकाम विभागाच्या देखरेखीखाली हा रस्ता करण्याचे काम केले जात आहे. सावंतवाडी येथील गणेश इन्फ्रा या ठेकेदार कंपनीच्या माध्यमातून हे काम सुरू आहे. तब्बल ७ मीटर रुंदीचा हा रस्ता राज्यमार्ग क्रमांक १८५ ला जोडत असून कोकण रेल्वेच्या तीन नंबर प्लॅटफॉर्म ला समांतर असा हा रस्ता सावंतवाडी वेंगुर्ले रस्त्यालाही जोडला जाणार आहे. या रस्त्यावर असलेल्या ओहोळावर ३ मीटर लांबी व रुंदीचा बॉक्स सेल बांधण्यात येणार आहे. सध्या या रस्त्याचे पहिल्या टप्प्यातील भरावाचे तसेच जीएसबी मटेरियल पसरण्याचे काम वेगाने सुरू आहे.


लवकरच हा रस्ता पूर्ण होणार असून त्यामुळे प्रवाशांची मोठी गैरसोय दूर होणार आहे. तसेच मळगाव शिवाजी चौक येथून रेल्वे फाटकातून निरवडे च्या दिशेने जाणाऱ्या प्रवाशांना देखील फाटक पडल्यावर होणारा विलंब टाळण्यासाठी हा रस्ता पर्यायी मार्ग म्हणून उपयुक्त ठरू शकणार आहे. त्यामुळे प्रवाशांमधून या रस्त्याबाबत समाधान व्यक्त होत आहे.

भविष्यात रेल्वे गाड्या वाढल्यास होणार फायदा

कोकण रेल्वे कडून भविष्यात सावंतवाडी रोड रेल्वे स्थानक अर्थात नियोजित सावंतवाडी टर्मिनस वर रेल्वे गाड्यांची संख्या वाढल्यास तीन नंबर प्लॅटफॉर्मवर अधिकच्या गाड्या थांबविल्या जाऊ शकतात. त्या पार्श्वभूमीवर सदरचा रस्ता हा मोठा उपयुक्त ठरू शकतो. यापूर्वी सार्वजनिक बांधकाम विभागाच्या माध्यमातून तत्कालीन मंत्री रवींद्र चव्हाण यांनी कोकण रेल्वेच्या कोकणातील रेल्वे स्थानकांना नवे रूप देण्याचे काम केले होते. याच पार्श्वभूमीवर सार्वजनिक बांधकाम विभागाच्या माध्यमातून हा रस्ता होत असल्याने त्याबाबतही समाधान व्यक्त होत आहे.