*कोंकण एक्सप्रेस*
*मत्स्य विभागाची धडक कारवाई : कर्नाटक येथील हायस्पीड नौका आरवलीत पकडली*
*वेंगुर्ला : प्रतिनिधी*
मत्स्यविकास मंत्री नितेश राणे यांनी मंत्री पदाचा पदाभार घेतल्यानंतर मत्स्य विभागाची धडक कारवाई सुरुच आहे. सिंधुदुर्ग किनारपट्टीवर पुन्हा एकदा सिंधुदुर्ग मत्स्य विभागाने कारवाई करत कर्नाटक येथील हायस्पीड नौका ताब्यात घेतली आहे.
आरवली वेंगुर्ला समोर १६ वाव पाण्यात मत्स्य व्यवसाय विभागाचे अंमलबजावणी अधिकारी मुरारी भालेकर सहाय्यक मत्स्य विकास अधिकारी (परवाना अधिकारी वेंगुर्ला) २८ जानेवारी रोजी नियमित गस्त घालत होते, त्यावेळी रात्री ११:३० चा सुमारास कर्नाटक राज्याच्या जलधी क्षेत्रासाठी परवाना असलेली जलशिला सुवर्णा कोटियान रा. कोदावूर ता. मलपे, राज्य कर्नाटक यांची नौका हनुमा सानिध्य नों. क्र.-IND – KA- २-MM-५२१७ द्वारे महाराष्ट्रातील जलधीक्षेत्रात आरवली वेंगुर्ला समोर अनधिकृतरित्या मासेमारी करत असताना पकडले, या नौकेवर नौका तांडेलसह इतर खलाशी होते. सदर नौका जप्त करून वेंगुर्ला बंदरात ठेवण्यात आली आहे आणि त्यावर असणाऱ्या मासळीचा लिलाव करण्याची कार्यवाही सुरू करण्यात आली.
अंमलबजावणी अधिकारी श्री मुरारी भालेकर, सहाय्यक मत्स्य विकास अधिकारी (परवाना अधिकारी वेंगुर्ला) यांनी पोलीस कर्मचारी श्री आळवेकर तसेच दीपेश मायबा, मिमोह जाधव व सागरी सुरक्षा पर्यवेक्षक सागर परब व राजेश कुबल, स्वप्निल सावजी, निलेश पाणजी, प्रणित मुणगेकर, हर्षद टाक्कर, भगवान तांडेल, चंद्रकांत कुबल, सागरी सुरक्षा रक्षक यांच्यासह कार्याने सदर कारवाई करण्यात आली. अंमलबजावणी अधिकारी यांनी प्रतिवेदन दाखल केल्यानंतर सदर नौकेबाबत सुनावणी मा. सहाय्यक आयुक्त मत्स्य व्यवसाय सिंधुदुर्ग यांच्या न्यायालयात ठेवण्यात येणार आहे.
