*कोंकण एक्सप्रेस*
*कणकवलीत रंगणार पर्यटन महोत्सव…!*
*महोत्सवमध्ये सहभागी होण्याचे स्थानिक कलाकारांना आवाहन*
*कणकवली : प्रतिनिधी*
कणकवलीचे माजी नगराध्यक्ष समीर नलावडे यांच्या संकल्पनेतून आणि कणकवलीचे आमदार नितेश राणे, कुडाळचे आमदार निलेशजी राणे खासदार नारायण राणे यांच्या मार्गदर्शनाने गेली अनेक वर्षे कणकवली पर्यटन महोत्सव साजरा केला जात आहे. अल्पावधीतच या महोत्सवाने कणकवलीकरांचे मन जिंकले आहे. या महोत्सवात अनेक नामांकित कलाकारांनी रसिकांची दाद मिळवली आहे. यंदाही नवीन वर्षाच्या सुरुवातीला 9 ते 12 जानेवारी या कालावधीत कणकवलीत पर्यटन महोत्सव रंगणार असून दिनांक 10 जानेवारी रोजी कणकवलीतील कलाकारांसाठी दिवस राखीव ठेवण्यात आला आहे.याविषयीची बैठक कणकवली नगरवाचनालयाच्या सभागृहात पार पडली.यावेळी आयोजकांसोबत अनेक स्थानिक कलाकार उपस्थित होते.
कणकवली शहरातील आणि तालुक्यातील कलाकारांच्या कलागुणांना वाव मिळण्यासाठी विविध प्रकारचे कार्यक्रम आयोजित केले जातात. यात नृत्य, गायन, वादन, विनोदी स्किट यासारख्या कलाप्रकारांचा समावेश असतो. या महोत्सवात सहभागी होण्यासाठी इच्छुक असणाऱ्यांनी सुहास वरूणकर 8600249624, हरिभाऊ भिसे, संजय मालंडकर यांच्याशी संपर्क साधावा. केवळ 25 डिसेंबर पर्यंत येणाऱ्या नावांचा कार्यक्रमासाठी विचार करण्यात येईल, असे आवाहन आयोजकांमार्फत करण्यात आले आहे.
