*कोंकण Express*
*आमदारकीची स्वप्ने पाहणाऱ्या “लँडमाफियांचा” सावंतवाडीत धुडगूस…*
*संजू परबांचा आरोप; लवकरच पुराव्यानिशी कारनामे उघड करणार….*
*सावंतवाडी ः प्रतिनिधी*
आमदारकीची स्वप्ने पाहत असणारे काही “लैंडमाफिया” सावंतवाडी मतदारसंघात धुडगूस घालत आहे. त्यांच्या जमिनी खरेदी करून लोकांची फसवणूक करत आहेत. त्यांच्यापासून सावध राहा, असे आवाहन करत लवकरच या लैंडमाफियांचे कारनामे पुराव्या सकट उघड करेन, असा इशारा भाजपचे जिल्हा उपाध्यक्ष संजू परब यांनी आज येथे आयोजित पत्रकार परिषदेत दिला. गेले काही दिवस आपण गप्प होतो. मात्र आता काही झाले तरी गप्प बसणार नाही. आरपारची लढाई निश्चित आहे. तसा हिरवा कंदील मला माझ्या नेत्यांनी दिला आहे, असे त्यांनी सांगितले. श्री. परब यांनी आज भाजप कार्यालयात पत्रकार परिषद घेतली. यावेळी ते बोलत होते. यावेळी शहराध्यक्ष अजय गोंदावळे, परिक्षित मांजरेकर, मोहीनी मडगावकर, संजय वरेरकर, विनोद सावंत, क्लेटस फर्नांडिस आदी उपस्थित होते.
यावेळी श्री. परब पुढे म्हणाले, मतदारसंघात काही लैंडमाफीया धुडगूस घालत आहेत. काहींना आमदार व्हायचे आहे. जनतेच्या जमिनी घेऊन त्या गोरगरिबांचे पैसे ठेवत आहेत. स्वतः ला भविष्यात होणारी अटक टाळण्यासाठी आमदार होण्याची स्वप्न बघत आहेत. अशा लोकांपासून जनतेने सावध रहावे. गेले काही दिवस मी गप्प होतो. माझ्या नेत्यांनी तोंडाला आवर घाल असे सांगितले होते. मात्र माझ्या नेत्यांनी आता मला बोलण्याची मुभा दिली आहे. नेत्यांकडून ग्रीन सिग्नल मला मिळाला आहे. त्यामुळे या लैंडमाफीयांचे नाव ज्या गोरगरिबांचे पेमेंट झाले नाहीत म्हणून रडत आहेत अशांना सोबत घेऊन जाहीर करेन. लोक दोन-दोन वर्षे त्यांच्या कार्यालयात फेऱ्या मारत आहेत. त्यामुळे यापुढे जनतेने अशांपासून सावध रहावे, बळी पडू नये, आजपासून माझी भूमिका स्पष्ट असेल. मी कुणाला घाबरलो नाही, घाबरत नाही असे मत श्री. परब यांनी व्यक्त केले. नाव जाहीर न केल्याने भाजपात हे लँडमाफीया आले किंवा असतील तर भूमिका काय असे विचारले असता संजू परब म्हणाले, या लैंडमाफीयाला कधीही भाजपचे तिकीट मिळणार नाही. त्यांना काही मिळणार नाही. लवकरच नाव जाहीर करेन, निवडणूक जाहीर होताच सगळी माणसे आणून बसवतो. मात्र लँडमाफीयाला आमदारकी मिळणार नाही.
