*कोकण Express*
*इन्स्पायर सिंधुदुर्ग सायकल मॅरेथॉनला उत्स्फूर्त प्रतिसाद*
*आमदार वैभव नाईक यांनी 25 किमी अंतर निर्धारित वेळेपूर्वीच केले पूर्ण*
*कणकवली ः प्रतिनिधी*
‘इन्स्पायर सिंधुदुर्ग’ अंतर्गत ओरोस येथे प्रथमच आयोजित करण्यात आलेली सायकल मॅरेथॉन उत्स्फूर्त प्रतिसादात आणि उत्साहपूर्ण वातावरणात पार पडली. यामध्ये यजमान सिंधुदुर्गसह उर्वरित महाराष्ट्र, गोवा व कर्नाटकातील मिळून एकूण ४१५ सायकलपटूंनी सहभाग नोंदवला. २५, ५० आणि १०० किमी अशा तीन गटात पार पडलेल्या या स्पर्धेत पांच वर्षांच्या मुलापासून ते कुडाळ मालवणचे आमदार वैभव नाईक, जागतिक विक्रमवीर सायकलपटू महेंद्र महाजन त्याचप्रमाणे पुरुष व महिला सायकलपटूंनी उत्स्फूर्त सहभाग नोंदवला. विशेष म्हणजे आमदार वैभव नाईक हे २५ किमी गटात सहभागी झाले होते. त्यांनी अतिशय उत्कृष्ट पद्धतीने सायकलिंग करीत निर्धारित वेळेपूर्वीच स्पर्धा पूर्ण करून पदक प्राप्त केले.
जिल्हाधिकारी के. मंजुलक्ष्मी यांच्या हस्ते झेंडा दाखवून या स्पर्धेचा शुभारंभ करण्यात आला. अतिरिक्त जिल्हाधिकारी मंगेश जोशी आणि युवा नेते आनंद उर्फ भाई सावंत यांच्या हस्ते सायकलपटूंना पदके व प्रशस्तीपत्रके प्रदान करण्यात आली. जिल्ह्यातील तरुणांना सदृढ आरोग्यासाठी सायकलिंगकरीता प्रेरित करण्यासाठी रेन्बो रायडर्स, ब्युटीज ऑन व्हिल्स, कुडाळ सायकल क्लब्स आणि पॉज यांच्या संयुक्त विद्यमाने ‘इन्स्पायर सिंधुदुर्ग’ या नावाने या मॅरेथॉनचे आयोजन करण्यात आले होते.
मुंबई-गोवा महामार्गावर ही ‘सायकल मॅरेथॉन’ पार पडली. या स्पर्धेचा शुभारंभ जिल्हाधिकारी के. मंजुलक्ष्मी, आंतरराष्ट्रीय सायकलपटू व एव्हरेस्टवीर महेंद्र महाजन, आमदार वैभव नाईक, आनंद उर्फ भाई सावंत, इन्स्पायर सिंधुदुर्गचे अध्यक्ष डॉ. बापू परब यांच्या प्रमुख उपस्थितीत पार पडला. यावेळी डॉ. रामनाथ परब, पत्रकार शेखर सामंत, डॉ. सिद्धांत परब, सिद्धार्थ सावंत, रुपेश तेली, सायकलपटू रमेश गावडे व संजय नाईक आदी मान्यवर उपस्थित होते.
जिल्हाधिकारी म्हणाल्या, सायकल स्पर्धेचा हा उपक्रम अतिशय चांगला असून त्याला मिळालेला प्रतिसाद हा खरोखरच लक्षवेधी आहे. यावेळी जिल्ह्यातील होतकरू सायकलपटूंसाठी ठेवण्यात आलेली अत्याधुनिक सायकल युवा नेते भाई सावंत यांच्या हस्ते विघ्नेश कोरगावकर याला प्रदान करण्यात आली. ही सायकल भाई सावंत यांनी पुरस्कृत केली होती. या मॅरेथॉनमध्ये १०० किमी गटात पुरुषांच्या बरोबरीने पाच महिलाही सहभागी झाल्या होत्या. या स्पर्धेत आर्यन महादेव भिसे (वय ५) सुकळवाड व स्वरा उल्हास पालव (वय५), ओरोस हे दोन सायकलपटू स्पर्धेतील सर्वात लहान सायकलपटू ठरले. त्यांनी २५ किमी अंतर सहज पार करीत पदक प्राप्त केले. तर १०० किमी स्पर्धेत सुकळवाडच्या डॉ. मृण्मई बापू परब या सर्वात ज्येष्ठ महिला सायकलपटू ठरल्या. त्यांनी १०० किमी टप्पा निर्धारित वेळेत पार करीत पदक पटकावले. २५ किमी अंतराच्या गटात बाल सायकलपटूचा मोठा सहभाग होता. या सर्व सायकलपटूंनी निर्धारित वेळेतच २५ किमी टप्पा पार करीत पदके पटकावली. ५० आणि १०० किमीच्या गटातही मोठ्या प्रमाणावर सायकलपटू सहभागी झाले होते. त्यामध्ये सायकलचे जागतिक विक्रमवीर महेंद्र महाजन, मुंबई येथील सायकलपटू रमेश गावडे, गोव्यातील सायकलपटू तसेच एक पंजाबी सायकलपटू देखील सहभागी झाला होता.
