*कोकण Express*
*खोटा पक्षप्रवेश दाखवून रूपेश राऊळांनी आपली पाठ थोपटून घेतली….*
*प्रमोद गावडे; संदीप पांढरेंना नव्या इनिंगच्या शुभेच्छा, नांदा सौख्यभरे…*
*सावंतवाडी ः प्रतिनिधी*
निरवडे येथील शिवसेनेच्याच कार्यकर्त्यांना पुन्हा पक्षात घेऊन तालुकाप्रमुख रुपेश राऊळ यांनी आपली पाठ थोपटून घेतली आहे. फक्त एका वाडीतल्या लोकांसह तीन सदस्य गेले. त्यामुळे साडे सहाशेचा आकडा हा निव्वळ फुगवण्यात आलेला आहे, अशी प्रतिक्रिया सावंतवाडी खरेदी विक्री संघाचे चेअरमन तथा निरवडेचे माजी सरपंच प्रमोद गावडे यांनी आज येथे दिली. दरम्यान या ठिकाणी शिवसेनेत गेलेल्या संदीप पांढरे यांना नव्या इनिंगच्या शुभेच्छा, त्यांनी आता तरी गावचा विकास करून दाखवावा, नांदा सौख्य भरे..! असाही चिमटा त्यांनी काढला.
निरवडे येथील भाजप व शिंदे गटातील कार्यकर्ते व पदाधिकाऱ्यांनी काल खासदार विनायक राऊत यांच्या उपस्थितीत शिवसेनेत प्रवेश केला. या प्रवेशाच्या पार्श्वभूमीवर श्री.गावडे यांनी आपली प्रतिक्रिया दिली.
ते म्हणाले, त्या ठिकाणी गेलेले लोक हे शिवसेनेचेच आहेत. यापूर्वीच ते शिवसेनेत होते. मात्र आपल्या राजकीय फायद्यासाठी त्यांना पुन्हा पक्षात घेऊन तालुकाप्रमुख राऊळ हे आपली पाठ थोपटून घेण्याचा प्रयत्न करत आहेत. मात्र ते आपल्या वरिष्ठ नेत्यांची निव्वळ फसवणूक करीत आहेत हे सत्य आहे. या ठिकाणी आम्ही झालेला पक्ष प्रवेश नाकारत नाही. परंतु गावात झालेल्या महाविकास आघाडीच्या माध्यमातून बिनविरोध निवडून आलेले दोन व निवडून आलेला एक असे तीन सदस्य वगळता अन्य कोणीही त्या ठिकाणी गेले नाही. तसेच एका वाडीतील लोकांनी पक्ष प्रवेश केला आहे. परंतु त्या ठिकाणी साडेसहाशे लोकांचा प्रवेश झाला, असे भासवून श्री. राऊळ लोकांची व नेत्यांची दिशाभूल करत आहेत. मात्र त्याचा कोणताही परिणाम आमच्या पक्षावर किंवा गावाच्या विकासावर होणार नाही. जे गेलेत त्यांना आमच्या शुभेच्छा आहेत. त्यांनी आता तरी गावाचा विकास करून दाखवावा, असाही टोला श्री. गावडे यांनी लगावला आहे.
