सिंधुदुर्गाचे पर्यटन धोरण ठरवण्यासाठी लवकरच मुख्यमंत्र्यांसोबत बैठक

*कणकवली ः प्रतिनिधी*

शिंदे गटात प्रवेश केल्यानंतर आपण राज्यात अनेक ठिकाणी दौरा केला, शिंदे गट शिवसेनेला राज्यात चांगला प्रतिसाद मिळत आहे. अनेकजण शिंदे गटात सामील होत आहेत. मुख्यमंत्री एकनाथ शिंदे यांच्यासारखे जनतेच्या प्रश्नांची जाणीव असलेले आणि ते सोडवण्याची तळमळ असलेले नेतृत्व राज्याला लाभले आहे. सिंधुदुर्गातील आकारी पड, आंबोली चौकुळ येथील कबुलायतदार प्रश्न, अपूर्ण असलेले ताळंबा, नरडवे धरण प्रकल्प, वनसंज्ञा यासारखे प्रलंबित प्रश्न येत्या दोन वर्षात शिंदे सरकारच्या माध्यमातून आपण सोडवणार आहे. सिंधुदुर्गच्या पर्यटन विकासाचे धोरण ठरविण्यासाठी मुख्यमंत्र्यांकडे लवकरच बैठक आयोजित केली जाणार असल्याची माहिती माजी खासदार सुधीर सावंत यांनी दिली. कणकवली शिंदे गट शिवसेना कार्यालयात आयोजित पत्रकार परिषदेत ते बोलत होते. यावेळी भास्कर राणे, दिलीप घाडीगावकर, दिनेश तेली उपस्थित होते.सुधीर सावंत म्हणाले आपण सिंधुदुर्ग जिल्ह्यात अनेक वर्ष काम करत आहे. त्यावेळी काँग्रेस पक्ष मजबूत केला नंतर राजीनामा देवून काँग्रेस पक्ष सोडल्यावर सर्व कार्यकर्त्यांना शिवसेनेत पाठवले. तेव्हा पासून शिवसेनेला प्रत्येक निवडणूकीत मदत केली. आता मुख्यमंत्री एकनाथ शिंदे यांच्या नेतृत्वामुळे शिवसेनेत त्यांच्या नेतृत्वात प्रवेश केला आहे. त्यामुुळे माझ्या बरोबर काम केलेल्या कार्यकर्त्यांनी एकनाथ शिंदे यांच्या नेतृत्वाखाली शिवसेनेत प्रवेश करावा. त्याच जोमाने आपण मिळून जिल्ह्यासाठी आणि महाराष्ट्रासाठी भक्कम काम करू असे आवाहन ब्रि.सावंत यांनी केले. ते म्हणाले गद्दार कोण आणि खरा कोण हे मुख्यमंत्री एकनाथ शिंदेच आपल्या कामातून सिद्ध करतील. जगातले सर्व उद्योग आणण्याची ताकद महाराष्ट्रासारख्या प्रगतशील राज्यात आहे. एखादा प्रकल्प बाहेर गेला म्हणून फरक पडत नाही. जिकडे फायदा तिकडे उद्योगपती जात असतात. पर्यटन विकास आणि गावागावात उद्योग निर्माण करण्यावर आमचा भर राहणार आहे. समृद्ध आणि आनंदी गावाचा प्रकल्प सिंधुदुर्गात आम्ही राबवत आहोत यात सर्व लोकांनी सहभागी व्हावे असे सावंत म्हणाले.शिंदे गटाच्या कार्यकारीणीबाबत त्यांना विचारले असता ब्रि. सावंत म्हणाले शिंदे गट शिवसेनेत अनेकजण प्रवेश करणार आहेत लवकरच जिल्ह्याची कार्यकारीणी आम्ही घोषित करणार आहोत तसेच मंत्री उदय सामंत, दीपक केसरकर यांच्या उपस्थितीत कणकवली कार्यालयाचे उद्घाटन होणार असल्याचे ते म्हणाले.