*कोकण Express*
*सिंधुदुर्ग जिल्ह्यातून हजारो पदाधिकारी देणार शिवसेनेसोबत एकनिष्ठतेचे प्रतिज्ञापत्र…!*
*50 हजार नवीन सभासद नोंदणीचे उद्दिष्ट…!*
*आम. वैभव नाईक यांच्या उपस्थितीत पदाधिकाऱ्यांचे प्रतिज्ञापत्र घेण्यास सुरुवात…!*
*कणकवली ः प्रतिनीधी*
सिंधुदुर्ग जिल्ह्यात शिवसेनेकडून नवीन सभासद नोंदणी करण्यात येणार आहे. तर जिल्ह्यात 50 हजार सभासद नोंदणीचे उद्दिष्ट ठेवण्यात आले आहे. तसेच जिल्ह्यातील शिवसेनेच्या पदाधिकाऱ्यांची शिवसेनेसोबत एकनिष्ठ असल्याबाबतची प्रतिज्ञापत्र देखील घेण्यास सुरुवात करण्यात आली आहे. या मोहिमेचा शुभारंभ आमदार वैभव नाईक यांच्या प्रमुख उपस्थितीत आज करण्यात आला. पदाधिकाऱ्यांची प्रतिज्ञापत्रे करून घेत असताना याबाबत बोलताना आमदार वैभव नाईक म्हणाले, जिल्ह्यातील शिवसैनिक व पदाधिकारी हे शिवसेना पक्षप्रमुख उद्धव ठाकरे यांच्यासोबत ठाम आहेत. सिंधुदुर्ग हा शिवसेनेचा बालेकिल्लाच आहे. शिवसेनेसोबत गद्दारी करणाऱ्यांची काय अवस्था होती हे यापूर्वी जिल्ह्याने पाहिले आहे. असा टोला आमदार नाईक त्यांनी कुणाचे नाव न घेता लगावला. त्यामुळे सिंधुदुर्ग जिल्ह्यातील सर्वच कार्यकर्ते पदाधिकारी हे शिवसेनेसोबतच आहेत व याबाबतची प्रतिज्ञापत्र सिंधुदुर्ग जिल्ह्यातून हजारो पदाधिकारी व शिवसैनिक देत आहेत असे श्री नाईक यांनी सांगितले. खासदार विनायक राऊत यांच्या नेतृत्वाखाली सिंधुदुर्ग जिल्ह्यातील सर्व शिवसैनिक व पदाधिकारी शिवसेना पक्षप्रमुख उद्धव ठाकरे यांच्या पाठीशी उभे आहेत असेही श्री नाईक यांनी यावेळी सांगितले. येत्या काळात शिवसेनेची ताकद युवा सेना, महिला आघाडी यांच्या माध्यमातून आम्ही अजून वाढवणार आहोत. येत्या आठ दिवसात शिवसेनेचे सिंधुदुर्ग जिल्ह्यात 50 हजार नवीन सदस्य नोंदणी देखील करण्यात येणार असल्याचे श्री नाईक यांनी सांगितले. यावेळी उपजिल्हाप्रमुख राजू शेट्ये, तालुकाप्रमुख शैलेश भोगले, युवा सेना समन्वयक राजू राठोड, युवा सेना उपतालुकाप्रमुख सचिन आचरेकर, माजी नगरसेवक भूषण परुळेकर, रिमेश चव्हाण, विकास लाड, राजू डोंगरे आदि उपस्थित होते.
