*कोकण Express*
*भाजपा उपाध्यक्ष गोट्या सावंत यांना दोन दिवस पोलीस कोठडी*
माजी जिल्हा परिषद अध्यक्ष गोट्या सावंत हे सर्वोच्च न्यायालयाच्या आदेशानुसार आज सोमवारी कणकवली कोर्टासमोर शरण आल्यानंतर आज दुपारी कणकवली कोर्टात त्यांना हजर करण्यात आले. या वेळी सरकारी पक्षाच्यावतीने ऍड. प्रदीप घरत यांनी युक्तिवाद केला. यावेळी त्यांनी जिल्हा न्यायालय, उच्च न्यायालय, व सर्वोच्च न्यायालयाने गोट्या सावंत यांचा अटकपूर्व जामीन फेटाळला, अजून पोलीस तपास करायचा आहे या सह अन्य मुद्दे उपस्थित करत पोलीस कोठडी देण्याची मागणी केली. तर गोट्या सावंत यांच्या वतीने ऍड. राजेंद्र रावराणे व ऍड. उमेश सावंत यांनी युक्तिवाद केला. यावेळी या गुन्ह्यातील बहुतांशी तपास पूर्ण झाला, आतापर्यंत अटक करण्यात आलेल्या आरोपींकडून पोलीस तपासात गोट्या सावंत यांचा सहभाग निष्पन्न झाली नाही, जिल्हा बँक निवडणुकीच्या पार्श्वभूमीवर राजकीय हेतूने हा आरोप करण्यात आला. असा युक्तिवाद ऍड. रावराणे यांनी केला यावेळी संतोष परब हल्ल्या प्रकरणाचे तपास अधिकारी तथा कणकवली पोलिस निरीक्षक सचिन हुंदळेकर देखील उपस्थित होते. दोन्ही बाजूंचे युक्तिवाद ऐकल्यानंतर कणकवली दिवाणी न्यायाधीश सलीम जमादार यांनी गोट्या सावंत यांना 16 फेब्रुवारी पर्यत पोलीस कोठडी सुनावली आहे .
