*कोकण Express*
*▪️एसटी कर्मचाऱ्यांच्या संपात राज्यभरात पडलेली फूट आता सिंधुदुर्गात पण सुरू..*
*▪️कणकवली विभागीय कार्यशाळेत आतापर्यंत 118 कर्मचारी कामावर रुजू*
*कणकवली ः प्रतिनिधी*
एसटी कर्मचाऱ्यांच्या संपात राज्यभरात पडलेली फूट आता सिंधुदुर्ग मध्ये पण पाहायला मिळाली आहे. एसटी कर्मचाऱ्यांच्या पगारवाढि सह अन्य मागण्या मान्य केल्यानंतर, विलीनीकरणावर ठाम राहत एसटी कर्मचाऱ्यांनी संप सुरू ठेवला आहे. मात्र त्यानंतर एसटी प्रशासनाकडून हळूहळू कारवाईचा बडगा उगारला जाऊ लागल्याने, ज्या कर्मचाऱ्यांना मागण्या मान्य आहेत असे कर्मचारी कामावर रुजू होऊ लागले आहेत. कणकवली विभागीय कार्यशाळेतील यापूर्वी 27 एसटी कर्मचारी रुजू झाले होते. तर आज शनिवारी सकाळी 61 कर्मचारी कामावर रुजू झाल्याची माहिती एसटीच्या सूत्रांनी दिली. आतापर्यंत विभागीय कार्यशाळेतील एकूण 132 पैकी 118 कर्मचारी कामावर रुजू झाल्याने संपकरी एसटी कर्मचार्‍यांमध्ये आता फूट पडल्याचे पाहायला मिळत आहे. पण कणकवली आगारातील चालक-वाहकांसह अन्य कर्मचारी अद्यापही विलीनीकरणाच्या मागणीवर ठाम असल्याने ते अजूनही संपात सहभागी झाले आहेत. त्यामुळे जोपर्यंत चालक-वाहक कामावर रुजू होत नाहीत तोपर्यंत एसटी वाहतूक सुरू होणार नसल्याने आता चालक वाहकांच्या भूमिकेकडे लक्ष लागून राहिले आहे
