*कोकण Express*
*बापाशी वैर आणि मुलाशी दोस्ती करून शिवसैनिकांची फसवणूक…*
*प्रत्येक घटनेवेळी राऊत रणांगण सोडून गायब*
*परशुराम उपरकर यांची खासदार विनायक राऊत यांच्यावर टीका*
*कणकवली ः प्रतिनिधी*
खासदार विनायक राऊत हे बापाशी वैर आणि मुलाशी दोस्ती करून सिंधुदुर्ग-रत्‍नागिरीतील शिवसैनिकांची फसवणूक करत आहेत. आतापर्यंत शिवसेनेचा राणेंविरोधात अनेकवेळा राडा झाला. मात्र त्‍या प्रत्येक घटनेवेळी राऊत रणांगण सोडून गायब झाले अशी टीका मनसेचे सरचिटणीस परशुराम उपरकर यांनी आज केली.
येथील मनसे संपर्क कार्यालयात श्री.उपरकर यांनी पत्रकार परिषद घेतली. यावेळी मनसे उपजिल्हाध्यक्ष दया मेस्त्री, तालुकाध्यक्ष दत्ता बिडवाडकर, दत्ताराम अमृते, शरद सावंत संतोष कुडाळकर आदी उपस्थित होते.
श्री.उपरकर म्‍हणाले, केंद्रीय उद्योगमंत्री नारायण राणे यांना बाळासाहेब ठाकरेंच्या स्मृतिस्थळी जाऊ देणार नाही, असे वक्तव्य विनायक राऊत यांनी केले. मात्र राणेंना विरोध करण्याचा खासदार श्री.राऊत यांचा केविलवाणा प्रयत्‍न फसला. आमदार नीतेश राणे यांच्याशी असलेल्‍या दोस्तीचा विषय आधीच मातोश्रीवर पोचला आहे. त्‍यामुळे मातोश्रीवरील नाराजी दूर करण्यासाठी आता राऊत राणेंवर आरोप करू लागले आहेत.
ते म्‍हणाले, राणेंना विरोध करण्याबाबत यापूर्वीही राऊत अनेक वक्तव्य केली आहेत. मात्र ऐन प्रसंगाच्यावेळी राऊत तेथून गायब झाले आहेत. यापूर्वी वेंगुर्ले राडा, कणकवलीतील आमने-सामनेची घटना तसेच इतर अनेक संघर्षाच्या घटनेवेळी राऊत लपून राहिले आहेत. एकीकडे नारायण राणेंशी टक्कर देणारा मी एकटाच अशी डरकाळी फोडायची आणि दुसरीकडे त्यांचा मुलगा नितेश ला मित्र म्हणायचे हा दुटप्पीपणा शिवसैनिकांना रुचलेला नाही.
श्री.उपरकर म्‍हणाले, यापूर्वी शिवेसना पक्षप्रमुख उद्धव ठाकरे आणि नारायण राणे एकाच व्यासपिठावर अनेक वेळा आलेले आहेत. यात दोहोंनीही एकमेकांना सन्माननीय असे म्‍हटले. पण मित्र म्‍हणून कधीच उल्‍लेख केलेला नाही. याउलट खाासदार विनायक राऊत यांनी वेंगुर्लेतील कार्यक्रमात आमदार नीतेश राणे हे आपले मित्र असल्‍याचा उल्‍लेख दोन वेळा केला होता. त्‍यामुळे शिवसैनिकांमध्ये राऊतांविरोधात प्रचंड अस्वस्थता आहे.
